ഇനി ചീത്ത പറയരുത്, പ്ലീസ് !

മാനവികതാ യാത്ര കഴിഞ്ഞു  കാന്തപുരം  ഉസ്താദ് തിരിച്ചെത്തിയിരിക്കുന്നു !  തിരിച്ചെത്തിയപ്പോള്‍ അനുയായികള്‍ക്ക് സന്തോഷം ! എല്ലാവര്ക്കും സന്തോഷം ! ഇപ്പോള്‍ തങ്ങളും, തങ്ങളുടെ അനുയായികളും,  ഇ.കെ സുന്നികളും, മുജാഹിടും, ജമാഅത്തും,  ഇതര മതസ്ഥരും  എല്ലാവരും തങ്ങളുടെ മാനവികതയില്‍ ഉണര്‍ന്നിരിക്കുന്നു. ഇനിയും  സന്തോഷമില്ലാവര്‍ തങ്ങള്‍ ഉണര്‍ത്താന്‍ ഇറങ്ങിയ മാനവികതക്കു നേരെ പുറം തിരിഞ്ഞു നില്‍ക്കുന്നവര്‍ !

എന്തായാലും, കുറ്റങ്ങളും ആരോപണങ്ങളും മാറ്റിവെച്ചാല്‍ കേരളത്തിന്റെ ഒരറ്റത്ത് നിന്നും മറ്റേ അറ്റത്തേക്ക് കാന്തപുരം നയിച്ച യാത്ര  കുറച്ചെങ്കിലും  മാനവികതയെ ഉണര്തിയിട്ടുന്ടെങ്കില്‍ അദ്ധേഹത്തെ അഭിനന്ദിക്കാം !  മനുഷ്യ  ഊര്‍ജ്ജവും, വളരെയേറെ ചിലവുകളും  വഹിച്ചു നടത്തിയ യാത്രയുടെ ലക്ഷ്യം  സമൂഹത്തില്‍ പ്രതിഫലിക്കട്ടെ എന്ന് പ്രാര്‍ഥിക്കാം !

തര്‍ക്കങ്ങളെ വിട, പരിഹാസങ്ങളെ വിട !! എന്നന്നേക്കും വിട !

ഇനി ഇതുവരെ ഉത്തരമില്ലാതിരുന്ന ഒരു ചോദ്യം "മാനവികതയില്‍" നിന്നും സ്വന്തം സമുധായത്തിനു നേരെ ഉയരുന്നു !  താനുള്‍കൊള്ളുന്ന സമുദായത്തില്‍ മാനവികതക്കുള്ള സ്ഥാനം കാന്തപുരം എങ്ങിനെ ഇനി പ്രതിഫലിപ്പിക്കാന്‍ പോകുന്നു ? തീര്‍ച്ചയായും മാനവികത ഒരു വെടിനിര്‍ത്തല്‍ ആണെന്ന് കരുതാം. സമുദായത്തിലെ മറ്റുള്ളവരെ പോലും ഒറ്റപെടുത്തി നിലനിര്‍ത്തിയിരുന്ന തന്റെ സംഘടനാ പക്ഷപാതിത്വം മാനവികതയുടെ വിശാലലോകത്തേക്കുള്ള  തിരിച്ചറിവ് നല്കീയിട്ടുന്ടെങ്കില്‍ അത്‌ തന്നെ വലിയൊരു മാറ്റമാണ്. നിസ്സാര ആശയ വൈജാത്യങ്ങളുടെ പേരില്‍ സമുദായ സംഘടനകളെ കാഫിര്‍ മുദ്രയടിച്ച കാലങ്ങള്‍ വിസ്മരിച്ചു കൊണ്ടു ഇതര മതസ്ഥരെ പോലും ഉള്‍കൊള്ളാന്‍ കഴിഞ്ഞ കാന്തപുരത്തിന്റെ ഇപ്പോഴത്തെ മാനവികത ഇനിയുള്ള അദ്ധേഹത്തിന്റെ കാഴ്ച്ചപാടുകളെ അടിമുടി മാറ്റിമറിക്കുമെന്ന്  വിശ്വസിക്കാം. 

സമൂഹം നേരിടുന്ന ഒട്ടനവധി പ്രശ്നങ്ങള്‍ ഉണ്ട്. ഈ പ്രശ്നങ്ങളെല്ലാം ജീവിതത്തില്‍ സമൂഹം നേരിടുന്നതായിരിക്കെ അതിനെതിരെ ഇനിയും പുറം തിരിഞ്ഞു നില്‍ക്കേണ്ടതില്ല എന്നാണ് മാനവികത യാത്രയില്‍ കാന്തപുരത്തിന്റെ വിഷയങ്ങളില്‍ പ്രതിഫലിച്ചത്. എതിര്പക്ഷനെതിരെ മൈക്കും വേദിയും ഒരുക്കി അനുയായി വൃന്ടങ്ങളെ ത്രസിപ്പിക്കുന്ന രീതിയില്‍ പരിഹാസങ്ങളും, ആക്ഷേപങ്ങളും വിനോദമാക്കിയ പണ്ഡിതരെ നിയന്ത്രിക്കാന്‍ മാനവികതക്കു മുന്നിട്ടിറങ്ങിയവര്‍ തയ്യാറാകണം. 

സമൂഹത്തിന്റെ ആരോഗ്യകരമായ ചിന്തകള്‍ക്ക് തുടക്കമിടാനും, സാമൂഹിക ഐക്യത്തിന് ബലമെകാനും ചിലവോന്നുമില്ലാത്ത ഈ പ്രവര്‍ത്തനത്തിലൂടെ കഴിയും.  പരസ്പരം മത്സരിച്ചു യാത്രകള്‍ക്കും, പ്രഹസന കാംപൈനുകള്‍ക്കും  വേണ്ടി ചിലവഴിക്കുന്ന ലക്ഷങ്ങള്‍ സമൂഹത്തിന്റെ ഉന്നമനത്തിനു കാര്യക്ഷമമായി വിനിയോഗിക്കാന്‍ കഴിയുന്ന ഒരു സാമൂഹിക അന്തരീക്ഷം നിര്‍മിക്കാന്‍ കാന്തപുരമടക്കമുള്ള എല്ലാ വിഭാഗം പണ്ഡിതരും ഇനിയെങ്കിലും തയ്യാറാകട്ടെ.  

അതുകൊണ്ട് ഇനി ചീത്ത പറയരുത്. പരിഹസിക്കരുത്,  പ്ലീസ്‌ ! മൈക്കെടുത്ത് ആശയ വിത്യാസങ്ങളുടെ  പേരില്‍ മറ്റുള്ളവരെ പരിഹസിച്ചു മിമിക്സ് പരേഡ് നടത്തി മാനവികതയില്‍ ഉണര്‍ന്ന ആളുകളെ ചിരിപ്പിക്കരുത്! ആളുകളെ കൊണ്ടു പറയിപ്പിക്കരുത് !